लमजुङ, फागुन । नेपाली कांग्रेसका उपसभापति विश्वप्रकास शर्माले वर्तमान जटिल परिस्थितिमा देशलाई सही दिशामा लैजान सक्षम नेतृत्व रोज्न मतदातालाई आग्रह गरेका छन ।

नेपाली कांग्रेस लमजुङको आयोजनामा सदरमुकाम बेँसीसहरमा सोमबार भएको चुनावी सभालाई सम्बोधन गर्दै उनले चुनाव केवल दलको जित–हारको विषय नभई देशलाई सङ्कटबाट निकास दिने क्षमताको परीक्षण भएको बताए ।

शर्माले भने, ' मूल प्रश्न कुन दलले जित्ने भन्ने होइन, मूल प्रश्न विषम परिस्थितिमा देशलाई कसले संयमताका साथ समन्वय गर्न सक्छ, कसले परिपक्व ढङ्गले गाँस्न सक्छ र हाँक्न सक्छ भन्ने हो ।

उनले ऐतिहासिक तथ्यका आधारमा कांग्रेसले मुलुकलाई सही ढङ्गले अघि बढाएको उदाहरण जनतामाझ लैजान आग्रह गरे । उनले इतिहासका विभिन्न मोडमा नेपाली कांग्रेसले देशभित्रका भिन्न शक्ति, दल र समुदायबिच समन्वय गरेर देशलाई निकास दिने भूमिका खेलेको दाबी गरे ।

अहिलेको बदलिँदो अवस्था र पुस्ताबिच पनि समन्वय गर्दै देशलाई नयाँ विश्वासको चरणमा लैजान सक्ने क्षमता कांग्रेससँग रहेको उनको भनाइ थियो ।

उपसभापति शर्माले २००७ सालको प्रजातान्त्रिक आन्दोलनदेखि २०७० सालको संविधानसभा निर्वाचनसम्मको उदाहरण प्रस्तुत गर्दै भने, ' २००७ सालको क्रान्तिपछि राणालाई मिलाउने कुरा, २०१५ सालपछि सबैलाई समेट्ने कुरा, पञ्चायत ढालेपछि राजालाई मिलाउने कुरा चानचुने थिएन् ।

लमजुङका मुक्ति अधिकारी जस्ता हजारौं मानिस मारिदाँ पनि माओवादीलाई मिलाएर ल्याएको दल कांग्रेस हो । २०६४ मा अहिलेको जस्तै हुरी चल्दा कांग्रेस दोस्रो दल बन्यो, चार वर्ष खेर गयो, देशले संविधान पाएन । २०७० मा काँग्रेस पहिलो दल बनेपछि दुई वर्षमै संविधान आयो । यो कुरा जनतालाई बुझाउनुपर्छ, उनले भने ।

उनले मतदातालाई गम्भीर भएर निर्णय लिन आग्रह गर्दै प्रश्न गरे, ' २०६४ जस्तै गल्ती दोहोर्याउने कि २०७० जस्तै विवेक पुगाउने ? आजको मूल प्रश्न कुन दलले जित्ने भन्ने होइन, मूल प्रश्न विषम परिस्थितिबाट देशलाई नवीन निकासमा कसले पुर्याउन सक्छ भन्ने रहेको उनको भनाइ छ ।

उनले जेनजी आन्दोलनपछिको आवेग र उत्तेजनालाई शान्तिमा ढालेर समाजलाई गाँसेर अघि बढ्न कांग्रेसलाई मत दिनुपर्ने बताए । अबको देशमा आशन, शासन र भाषण सुधार्नेगरी कांग्रेस अघि बढेको उनले बताए । उनले भने, 'अब कांग्रेस एउटै व्यक्तिले मात्र अवसर पाउने छैन् ।

दुई पटकभन्दा बढी प्रधानमन्त्री हुन पाइँदैन, अब सक्ने कुरा मात्र बोल्छौं, गर्न सक्ने मात्र गर्छौं । कसैलाई गाली गर्दैनौं । कांग्रेस यतिबेला सभापति गगन थापालाई प्रधानमन्त्री बनाउने अभियानमा लागेको बताउँदै उनले भने, 'त्यही अभियानको लहरमा लमजुङ पनि मिसिने छ ।

देशलाई नवीन सपनामा, नवीन मार्गमा लैजानुछ । यदि सही ढङ्गले देशलाई अघि बढाउन सकेनौं भने अहिले जेनजी विद्रोह भयो, १० वर्षपछि फेरि अल्फाको विद्रोह हुने छ । हामी त्यो अबस्था बन्न दिने छैनौं ।

चुनावी सभामा कांग्रेसका उम्मेद्वार गमप्रसाद गुरुङ, पूर्व केन्द्रीय सदस्य दिलबहादुर घर्ती, जिल्ला सभापति एवं गण्डकी प्रदेशका अर्थमन्त्री डा. टकराज गुरुङ, जिल्ला सचिव आनन्द घिमिरे, कोषाध्यक्ष सृजना गुरुङ, तरुण दल लमजुङका अध्यक्ष कुमराज गुरुङ (भुपेश) लगायतले मन्तव्य राखेका थिए । - गाेरखापत्रबाट