मंगलवार, आश्विन २७ गते २०८३
मंगलवार, आश्विन २७ गते २०८३
सोमवार , आश्विन २६, २०८३
काठमाडौँ, असोज। बुढीगण्डकी नदीमा आएको बाढीबाट प्रभावित क्षेत्रबाट नेपाली सेनाले हालसम्म ९५ जनाको उद्धार गरी सुरक्षित स्थानमा स्थानान्तरण गरेको छ । उद्धार गरिएकामध्ये नौ जना विदेशी नागरिकसहित ३५ जनालाई आरुघाटबाट काठमाडौँ ल्याइएको नेपाली सेनाले जनाएको छ ।
बाढी प्रभावित क्षेत्रमा उद्धारका लागि नेपाली सेनाका चार वटा हेलिकोप्टर तथा स्थलमार्गबाट सैनिक टोली परिचालन गरिएको छ । अन्य सुरक्षा निकाय र सम्बन्धित सरोकारवालासँगको समन्वयमा प्रभावित क्षेत्रमा खोज तथा उद्धार कार्य जारी रहेको सेनाले जनाएको छ ।
बाढीले आरुघाट–धादिङ जोड्ने मोटरेबल पुल बगाएपछि उक्त क्षेत्रको सडक सम्पर्क प्रभावित भएको छ । पुल क्षतिग्रस्त हुँदा आरुघाट र धादिङबिच उक्त पुल भएर हुने सवारी आवागमन अवरुद्ध भएको छ ।
यसले स्थानीयवासीको आवतजावत तथा प्रभावित क्षेत्रमा सडकमार्गबाट राहत सामग्री र उद्धार टोली परिचालन गर्न कठिनाइ सिर्जना गरेको छ । पुल बगाएको स्थानमा सडक सम्पर्क पुनःस्थापनाका लागि बेलिब्रिज जडान गर्ने तयारी गरिएको छ । त्यसका लागि नेपाली सेनाको इन्जिनियरिङ टोली प्रभावित क्षेत्रमा खटिएको जनाईएको छ ।
