सोमवार, आश्विन ५ गते २०८३
सोमवार, आश्विन ५ गते २०८३
नेपाली राजदूतावास दोहा
शुक्रवार , श्रावण ३०, २०७७
कतार, साउन । कतारबाट नेपाल फर्किने ९ हजार ३८५ जना नेपालीको सूची नेपाली राजदूतावास दोहाले सार्वजनिक गरेको छ । नेपाल फर्कनका लागि व्यक्तिगत रुपमा ५ हजार ७५७ जनाले फारम भरेका छन् भने यहाँका कम्पनीले आफ्ना कामदार पठाउन ३ हजार ६२८ जनाको विवरण दूतावासलाई बुझाएका छन् ।
२६ जुन देखि ११ अगष्ट २०२० सम्म राजदूतावासको अनलाइन फारम भरेका नेपालीको नामावली दूतावासले प्रकाशित गरेको हो ।
दूतावासले प्रकाशित गरेको नामावलीमध्येबाट प्राथमिकताका आधारमा स्वदेश फिर्ता पठाइने छ । यसअघि दूतावासले स्वदेश फर्कनै पर्ने व्यक्तिहरुको पहिलो नामावली १२ जुनमा र दोस्रो नामावली २५ जुनमा प्रकाशित गरेको थियो ।
कोरोनाको महामारी फैलिएपछि कतारबाट चार्टर उडान मार्फत ५ हजार नेपाली स्वदेश फर्किसकेका छन् भने लकडाउन पश्चात विभिन्न कारणले मृत्यु भएका ४० नेपालीको शवसमेत नेपाल पठाइएको दूतावासले जनाएको छ ।
कोभिडका कारण कतारमा हजारौं नेपालीहरुले रोजगारी गुमाएका छन् । समयमै स्वदेश फर्कन नपाउदा उनीहरु थप पीडित बनेका छन् ।
लामो समय नियमित हवाई उडान बन्द हुँदा यहाँ रोजगारी गुमाएर बसेका श्रमिकहरु समस्यामा रहेका छन् । हाल कतारमा करिव ३ लाख ५१ हजार नेपाली श्रमिक कार्यरत छन् ।
