सोमवार, आश्विन ५ गते २०८३
सोमवार, आश्विन ५ गते २०८३
शनिवार , आश्विन १२, २०८१
काठमाडौँ, असोज । गृहमन्त्री रमेश लेखकले मुलुकभर अविरल वर्षापछि आएको बाढी, पहिरो र डुबानबाट प्रभावितको उद्धार, राहत र घाइतेलाई उपचारमा सरकार संवेदनशील भएर लागिरहेको बताएका छन् ।
गृहमन्त्री लेखकले प्राकृतिक विपद्जन्य घटनाबाट जोखिममा परेकाको उद्धार र राहतमा सरकार गम्भीर भएर लागिरहेको जानकारी दिएका हुन् ।
कमान्ड पोस्टको सिंहदरबारमा शनिबार बिहान बसेको बैठकपछि गृहमन्त्री लेखकले बिहानसम्म काठमाडौंमा मात्रै साढे सात सयभन्दा बढी जोखिममा परेका मानिसलाई उद्धार गरिएको बताएका हुन् ।
देशभर धेरै जनधनको क्षति भएको, सडक, पुलपुलेसा बगेका कारण नागरिकको जनजीवन अस्तव्यस्त रहेकाले सहज बनाउने काम भइरहेको गृहमन्त्रीको भनाइ थियो ।
‘अहिले काठमाडौंमा मात्रै साढे सात सयभन्दा बढी जोखिममा परेका मानिसहरूको उद्धार गरिएको छ । देशभर मानिसहरूले ज्यान गुमाएको स्थिति छ । सडक अवरुद्ध भएको, पुलहरू बगेको स्थिति छ ।
पहिरो, बाढी र डुबान भएको छ । त्यसलाई हामीले देशभरको सूचना संकलन गरेका छौँ । त्यसको मूल्यांकन गरेका छौँ,' लेखकले भने, 'जोखिममा रहेका मानिसहरूलाई नेपाल सरकार अत्यन्त गम्भीरतापूवर्क, अत्यन्त संवेदनशील भएर यो विपद्को घडीलाई हेरिरहेका छौँ ।
म सबै दिदिबहिनी दाजुभाईलाई आश्वस्त गर्न चाहन्छु, नेपाल सरकारले आफ्नो तर्फबाट उद्धार गर्ने काममा, राहत दिने काममा, घाइतेको उपचार गर्ने काममा र सडकहरू अवरोध भएको स्थिति, बाढी, पहिरोका कारणले पुल पुलेसा बगाएको अवस्थामा मानिसहरूलाई पुनःस्थापित र पुनः निर्माण गर्ने काममा हामी अत्यन्त गम्भीरतापूर्वक काम गर्नेछौँ ।'
गृहमन्त्री लेखकले सबै नागरिकलाई सुरक्षित स्थानमा बस्न र आफ्नो नजिक जोखिममा रहेका मानिसहरूलाई सहयोग गर्न आग्रह गरेका छन् ।
गृहमन्त्री लेखकले नागरिकको जीवन जोगाउन र सुरक्षित राख्ने काममा सरकार संवेदनशील भएर खटेको जानकारी दिए ।
