सोमवार, आश्विन ५ गते २०८३
सोमवार, आश्विन ५ गते २०८३
शनिवार , मंसिर १६, २०८०
काठमाडौँ, मंसिर । प्रधानमन्त्री पुष्पकमल दाहालले मानव जातिलाई जोगाउनका लागि हिमाल जोगाउनुपर्ने बताएका छन् । नेपालको तर्फबाट पहिलो पटक जलवायु परिवर्तनसम्बन्धी संयुक्त राष्ट्रसंघीय सम्मेलन (कोप २८) मा उच्चस्तरीय राउन्डटेबल बैठकको अध्यक्षता गर्दै प्रधानमन्त्री दाहालले हिमाल जोगाउनका लागि अन्तर्राष्ट्रिय समुदायलाई आह्वान गरेका हुन् ।
शनिबार दुबईमा कार्यक्रमको अध्यक्षता गर्दै प्रधानमन्त्री दाहालले हिमाली मुलुक र त्यहाँका बस्तीका पीडा बुझ्नका लागि अन्तर्राष्ट्रिय समुदायलाई आग्रह गरेका हुन् ।
'म नेपालको प्रधानमन्त्रीको हैसियतमा सबै अन्तर्राष्ट्रिय समुदायलाई ‘हामीलाई बचाउन हाम्रा हिमाल बचाऔं,’ भन्ने अपिल गर्न चाहन्छु,' उनले भने, 'हिमाली क्षेत्रका बासिन्दाको पीडा बुझ्न, सम्भावित समाधान खोज्न र समस्याबाट बाहिर ल्याउन हिमाल र जलवायु परिवर्तनसम्बन्धी संवादको थालनी गर्न म दृढतापूर्वक सुझाव दिन्छु ।'
प्रधानमन्त्री दाहालले विश्वका नेताहरूले हिमाल, हिमाली पारस्थितिक प्रणाली र हिमाली जनताको दिगो भविष्यको रक्षा गर्न एकसाथ हिँड्नुपर्ने आग्रह गरेका थिए ।
हिमाल, हिमाली सभ्यता, हिमाली पारिस्थितिक प्रणाली र हिमालका बासिन्दाहरूको संरक्षण र प्रबर्द्धन गर्न र हिमालमा जलवायु परिवर्तनले निम्त्याएका साझा चुनौतीहरूको सामना गर्न सहयोग र ऐक्यबद्धता हासिल गर्न खोजेको उनले बताए ।
नेपालको तर्फबाट प्रधानमन्त्री दाहालले अध्यक्षता गरेको बैठकलाई संयुक्त राष्ट्रसंघका महासचिव एन्टोनियो गुटेरेसले समेत सम्बोधन गरेका थिए ।
महासचिव गुटेरेसले हिमालका मुद्दा सम्बोधन गर्न ढिला गरे यसबाट अपूरणीय क्षति हुने बताउँदै जिम्मेवार मुलुक र निकायले छिटोभन्दा छिटो सम्बोधन गर्न लाग्नुपर्ने बताए । '
मैले आफैंले हिमालमा जलवायु परिवर्तनमा असर हेरेर आएको छु । अब यसमा ढिला भइसक्यो । सम्बोधन गर्न सबै लाग्नुपर्छ, उनले भने ।
प्रधानमन्त्री दाहालले ग्लोबल वार्मिङलाई १.५ डिग्री सेल्सियसमा सीमित गर्नुपर्ने चुनौती र प्रतिबद्धताका साथ कोप-२८ मा विश्वका नेताहरू भेला भएको बताए ।
उनले मानवसिर्जित ग्लोबल वार्मिङले अभूतपूर्व जलवायु अराजकता निम्त्याएको पनि बताए ।
आईपीसीसीको प्रतिवेदनले चक्रवात, बाढी र खडेरीको कम जोखिम भएका क्षेत्रमा मृत्युदर उच्च तहको जोखिम भएको क्षेत्रको तुलनामा पन्ध्र गुणा बढी रहेको स्पष्ट पारेको पनि प्रधानमन्त्रीले उल्लेख गरे ।
प्रधानमन्त्री दाहालले जलवायु न्यायको यात्रामा धेरै हासिल गर्न सकिने बताए ।
