सोमवार, आश्विन ५ गते २०८३
सोमवार, आश्विन ५ गते २०८३
बिहिवार , माघ २२, २०८२
काठमाडौँ,माघ । आईसीसी टी–२० विश्वकपको तयारीलाई अन्तिम रूप दिने क्रममा नेपाली क्रिकेट टोलीले आज क्यानडासँग आफ्नो अन्तिम अभ्यास खेल खेल्दैछ। अघिल्लो खेलमा यूएईलाई सात विकेटले पराजित गरेर उच्च मनोबलमा रहेको नेपाली टोली क्यानडाविरुद्ध पनि जित निकाल्दै आत्मविश्वासका साथ विश्वकपमा प्रवेश गर्ने लक्ष्यमा छ। चेन्नईस्थित एमए चिदम्बरम मैदानमा हुने यो खेल दिउँसो १ बजेर १५ मिनेटमा सुरु हुनेछ।
विश्वकपअघि भारत र श्रीलङ्कामा खेलेका अभ्यास खेलहरूबाट राम्रो अनुभव बटुलेको नेपालले क्यानडाविरुद्धको आजको खेललाई आफ्नो अन्तिम शक्ति परीक्षणका रूपमा लिएको छ। नेपालले फेब्रुअरी ८ मा बलियो प्रतिद्वन्द्वी इङ्ल्यान्डसँग खेल्दै विश्वकपको ऐतिहासिक यात्रा सुरु गर्नेछ।
यसपटक समूह ‘सी’ मा परेको नेपालले दुई पटकको विश्व विजेता वेस्ट इन्डिज र एक पटकको विजेता इङ्ल्यान्ड जस्ता क्रिकेटका हस्तीहरूसँग प्रतिस्पर्धा गर्नुपर्नेछ। यो समूहमा स्कटल्यान्ड र इटाली पनि रहेका छन्।
नेपालले फेब्रुअरी १२ मा इटाली, १५ मा वेस्ट इन्डिज र १७ मा स्कटल्यान्डसँग खेल्ने तालिका छ। रोचक कुरा के छ भने, नेपालले इङ्ल्यान्ड र इटालीसँग पहिलो पटक अन्तर्राष्ट्रिय क्रिकेट खेल्न लागेको हो। समूह चरणका सबै खेलहरू मुम्बईमा हुनेछन्, जहाँ नेपाली समर्थकहरूको उत्साह यति धेरै छ कि सबै खेलका टिकटहरू अग्रिम रूपमा बिक्री भइसकेका छन्।
सन् २०१४ र २०२४ पछि तेस्रो पटक विश्वकप खेल्न लागेको नेपालले यस संस्करणमा नयाँ इतिहास रच्ने लक्ष्य राखेको छ। कप्तान रोहित पौडेलको नेतृत्वमा युवा र अनुभवी खेलाडीहरूको सन्तुलित संयोजनसहित मैदान उत्रिएको नेपाली टोलीले मैदानमा शतप्रतिशत नतिजा निकाल्ने प्रतिबद्धता जनाएको छ। विश्वकपका अन्य समूहहरूमा पनि भारत(पाकिस्तान र अस्ट्रेलिया जस्ता दिग्गज टोलीहरूबीच कडा प्रतिस्पर्धा हुने देखिएको छ। हरेक समूहबाट शीर्ष दुई टोलीहरू सुपर आठमा प्रवेश गर्ने प्रावधान रहेकाले नेपालले हरेक खेललाई निर्णायक मान्दै उच्च सतर्कताका साथ खेल्ने तयारी गरेको छ।
