सोमवार, आश्विन ५ गते २०८३
सोमवार, आश्विन ५ गते २०८३
आइतवार , आश्विन २०, २०८१
काठमाडौँ, असोज । नेपाली कांग्रेसले विपद् र चाडपर्वको मुखमा श्रमजीवी वर्गलाई मर्का पर्नेगरी कालोबजारीहरू सक्रिय भएको बताएको छ ।
साथै, प्रभावकारी बजार अनुगमन र तत्काल कारबाही गर्ने संयन्त्र परिचालनका लागि सरकारको ध्यानाकर्षण गराएको छ ।
नेपाली कांग्रेसको श्रमिक तथा ट्रेड युनियन विभागका प्रमुख एवम् केन्द्रीय सदस्य हरिशरण नेपालीसहित नेताहरूले आइतबार गृहमन्त्री रमेश लेखक र श्रम तथा रोजगारमन्त्री शरतसिंह भण्डारीलाई छुट्टा-छुट्टै ज्ञापनपत्र बुझाउँदै विपद् र चाडपर्वको मौका छोपी मौलाएको कालोबजार नियन्त्रणका लागि ध्यानाकर्षण गराएका हुन् ।
'कालोबजार सिर्जना गर्नेलाई तत्काल कारबाही गर्न विशेष संयन्त्र परिचालन गरी निम्न मध्यम वर्गीय श्रमजीवीको आहतको घडीमा सुनिने, देखिने र अनुभव गरिने खालको कार्य तत्काल गर्न सरकारको ध्यानाकर्षण गराउँछु,' विभागका प्रमुख नेपालीले ज्ञापन पत्रमार्फत् भनेका छन् ।
विभागले संकटको घडीमा हरेक नागरिकलाई राज्यको अभिभावकत्व आवश्यक पर्ने भन्दै सरकार संवेदनशील भएर काम गर्नुपर्ने अवस्था रहेको स्मरण गराएको छ ।
' बाढीपहिरो र डुबानबाट देशभर हजारौँ श्रमजीवी वर्ग घरबारविहीन भएका छन् । कयौँ परिवारहरू विस्थापित भएका छन् ।
कहालीलाग्दो यस अवस्थाबाट सबैभन्दा धेरै श्रम क्षेत्र र श्रमिक वर्ग प्रताडित भएका छन्,' विभागका प्रमुख नेपालीले ज्ञापनपत्र मार्फत् भनेका छन्, ' यस्तो अवस्थामा घरबारविहीन भएकाका निम्ति राज्यले अभिभावकत्व लिनुपर्छ । उनीहरूको गास, बास र आवासको प्रबन्ध गर्न सरकारले मद्दत पुर्याउनुपर्छ ।'
